بندوں پہ ہے خدا کی عنایت مہِ صیام
برکت مہِ صیام ہے رحمت مہِ صیام
لیتا ہے ہم سے گرچہ مشقت مہِ صیام
دیتا بھی ہے بشارتِ جنت مہِ صیام
کرتا ہے دور عسرت و غربت مہِ صیام
لاتا ہے اپنے ساتھ سخاوت مہِ صیام
ذکر و دعا درود و تلاوت مہِ صیام
طاعت مہِ صیام عبادت مہِ صیام
روحانیت کو بخش دے طاقت مہِ صیام
ایمان کی بڑھائے حلاوت مہِ صیام
قدرِ مہِ صیام کا اندازہ ہو گا تب
صائم کی جب کرے شفاعت مہِ صیام
غیبت سے جھوٹ، چغلی و گالی گلوچ سے
کرتا ہے صائمیں کی حفاظت مہِ صیام
اہلِ ہوا کو کرتا ہے اہلِ صفا کی مثل
دیتا ہے عاصیوں کو ولایت مہِ صیام
کرتے ہیں روزہ خوری جو ماہِ صیام میں
کرتا ہے اثرؔ ان کو ملامت مہِ صیام
