آؤ ہم بن جائیں تارے
ننھے ننھے پیارے پیارے
دھرتی سے آکاش پہ جائیں
چمکیں دمکیں ناچیں گائیں
بادل آئے دھُوم مچاتے
لے کر کالے کالے چھاتے
آؤ ہم بھی دھُوم مچائیں
اُن کے پردوں میں چھُپ جائیں
آؤ آنکھ مچولی کھیلیں
مل کر سب ہمجولی کھیلیں
لو گُل زار شفق کا پھُولا
ڈالا آ کے دھنک نے جھُولا
آو جھُولیں اور جھُلائیں
ان کے رنگ اُتار کے لائیں
پھر اُن رنگوں سے پچکاری
بھر لیں اپنی باری باری
آؤ کھیلیں ہولی کھیلیں
مل کر سب ہم جولی کھیلیں
