گو بندہ نہیں ہوں کسی کام کا
میں قاری ہوں ’’بچوں کے اسلام‘‘ کا
ہے بچوں کا اسلام مجھ کو پسند
جبھی میں نے لکھے ہیں یہ چند بند
بس اب چاپلوسی و صنعت کے بعد
میں مقصد پہ آتا ہوں مدحت کے بعد
ہے درخواست میری چچا اشتیاق
کہ مجھ کو ہے اس کا بڑا اشتیاق
مری نظم کو آپ شائع کریں
مری کاوشوں کو نہ ضائع کریں
یہ مانا بری میری تحریر ہے
کہ شاہیں کو اقبالِ تقصیر ہے
نہ لکھنے لکھانے کا کچھ ڈھنگ ہے
نہ پڑھنے پڑھانے کا کچھ ڈھنگ ہے
ہیں مانا کہ اشعار بھی عام سے
مگر مجھ کو رغبت جو ہے آم سے
جگہ اس جریدے میں کچھ آپ دیں
یہ احسان ہو گا مجھے چھاپ دیں
رسالے کی خاطر ضروری ہوں میں
کہ آخر اثرؔ جونپوری ہوں میں
